Barr an tSléibhe

Is a Mháire tá díchéile ort mura dté tú liom ‘un a tsléibhe
Ná fág anseo liom fhéin mé go huaigneach ins an oíche,
‘S tá do theach mór á dhéanamh faoi sheomraí geala in éadan
Agus beidh muid ann go haerach go héag ar bheagán cíos.

Is dá bhfeicfeá barr an tsléibhe nuair a bhíonns an ghrian ag éirí
‘S níl duibheagán sa spéir ann ná gangaid ins an ngaoth.
Tá an broc ar thaobh an léanna ann, tá an sionnach rua ar na péaca
Tá an giorria ag boc-léimneach le pléisiúr insa bhfraoch.

Tá úth na mba ag pléascadh ag teacht abhaile ‘géimneach
Nach binn deas ceol na n-éan ann ins na gleannta teacht na hoíche
Tá an fear ‘s a bhean in éindí go grámhar lena chéile.
Is an seanduine bheadh na céadta bliain níorbh fhada leis a shaol.

Tá coirce bán is eorna ann tá fataí ‘s rud go leor ann
Tá cuireadh ag lucht bóthair ann is tá fáilte roimh gach n-aon
Tá O’Reilly seinm cheoil ann, tá fíon tá brandy ‘s beoir ann
I gcomhluadar daoine móra ‘gus an t-airgead dhá roinnt.

Tá an stiléara i gcónaí ann is na baraillí á líonadh
Tá cead ag clann na ríthe bheith go síoraí ann ag ól
Tá an sagart ann is córa dhá bhfaighfeá-sa in aon deoise
Is a Mháire tóg mo chomhairle ó tar is éalaigh liom.