Co. Mhaigh Eo

Agus liostáil mé le sáirsint ag goil sráid a’ bhaile mhóir,
‘Gus chuir sé sin thar sáile mé mar bhí mé go bocht óg;
Chuir sé gine buí i ngach láimh liom agus raidhfil le mé ghardáil
Ach dúirt mé leis go mb’fhearr liom é ná a bheith in Éirinn go mór.

‘S ar an loing seo, a Pheaid Uí Loingsigh sea a déanann mé an brón
Ag osnaíl ins an oíche agus go síoraí gol sa ló,
Ach anois ó dalladh m’intinn, is mé a bheith i bhfad ó mo mhuintir,
Is dá mairfinn is deas a chaoinfí mé i gContae Mhaigh Eo.

Agus murach bás mo mháithrín óra bheinnse maith go leor
Bheadh buidéal ins gach láimh liom ‘gus mé i gcomhluadar bean óg.
Ach ag síor-ól na gcártaí, agus an dlí a bheith ró-láidir
‘S ní Santa Cruz a d’fhágfainn mo chnámha faoin bhfód.

‘Gus tá punt is fiche amuigh orm i gContae Mhaigh Eo
‘S ní rachaidh mé dhá éileamh ann ó choíche ná go deo
Ar fhaitíos go mbéarfaidh thiar orm agus go gcrochfaí mar gheall ar fhiacha mé
‘S go bhfáiscfí boltaí iarainn orm go hiallachaí mo bhróig.

‘Gus a chomrádaí na dílse, ‘s tá mé cloíte go mór,
Is dheamhain a b’fhéadfainnse cur síos dhuit ar dhá thrian go mo bhrón;
Ach ós tusa is túisce a chífeas ‘gus a maireann go mo mhuintir,
Ó, tabhair mo bheannacht síos leat go Contae Mhaigh Eo.