Bean a’ Leanna – Sean Nós na bhFear 2013

Téamaí

Bean a’ Leanna

Agus éirigh i do shuí a bhean a’ leanna, is ná fan le do chaipín a ghléas’,
Nó go dtuga tú dhúinn braon uisce beatha, nó braon de do chuid leanna fhéin,
Agus beidh muid ag ól anseo go maidin, seo sláinte na bhfear uilig go léir,
’S nuair a fhágfas an mháistreás an baile, beidh an cailín is deise agam féin.

Is a Thiarna céard a dhéanfas mé amárach, nuair a fheicfeas mé mo ghrá a’ goil aniar,
’S gan goir’ agam a theacht ina láthair, leis an méid a bhí eadrainn ariamh,
Nuair a smaoiním ar a súgradh ’s ar a gáire, is ar oineach a dhá láimh a bhí fial,
Nach dtiteann mo chroí istigh i ndólás, agus goilim féin mórán ina diaidh.

’S bhí mise tráthnóna ’s mé súgach, ’s mé a’ triall ar tigh Mhicil sa ngleann,
Bhí streancán de shean-phíobaire caoch ann, agus jug poitín líonta aige ar clár,
Ó thiteamar marbh lag síos ann, níor fhan mothú ’nár gcois ná ’nár láimh,
Seo sláinte féile ár sinsear, agus íocfaidh mé féin an reicneáil.

’S nach fada iad mo chosa gan bróga, ’s nach fada iad mo phócaí gan pingin,
’S nach fada mé a’ siúl le mná óga, ach níor ól mé aon deor fós le mo mhian,
’S nach fada mo chóntra dhá déanamh, mo thuamba dhá bhreacadh ag na saoir,
Mo chróchar dhá thóigeáil lá Earraigh, ’s na buachaillí óga ag gabháil faoi.

Agus shiúil mise bograch agus sléibhte agus cnoic a bhí géar as a mbarr,
’Gus a lán bealaí eile nach ndéarfainn, ’s gan únsa ar bith céille i mo cheann,
Ar thuairisc mo stáidbheainín bhéasaigh, nach sínfead mo thaobh léi go brách,
Is go mba chóra dhi ’ bheith ’na codladh taobh thuas dhíom, ná ‘ bheith i gCorcaigh dhá uair roimh a’ lá.