Contae Mhaigh Eo

Agus liostáil mé le sáirsint ag goil sráid an bhaile mhóir,
‘S chuir sé anonn thar sáile mé mar bhí mé go bocht óg;
Chuir sé gine buí ins chaon láimh liom ‘gus raidhfil le mé ghardáil
Is dúirt sé liom go mb’fhearr dhom é ná in Éirinn go mór.

‘S ar an loing seo, a Pheaid Uí Loinsigh sea a dhéanaimse dobrón
Ag osnaíl ins an oíche ‘gus síoraí gol sa ló,
Ach anois ó dalladh m’intinn, is mé i bhfad ó mo mhuintir,
Dar m’fhocal gur maith a chaoinim-se Contae Mhaigh Eo.

‘S murach bás mo mháithrín ó bheinnse maith go leor
Bheadh buidéal ins chaon láimh liom is mé i gcomhluadar bean óg.
Marach síor-ól na gcárta, ‘s an dlí a bheith ró-láidir
Ní i Santa Cruz i d’fhágfaidh mo chnámha faoin bhfód.

Tá punt is fiche amuigh orm i gContae Mhaigh Eo
Is ní rachaidh mé á éileamh ann choíchín ná go deo
Ar fhaitíos go mbéarfaí thiar orm ‘gus go gcrochfaí i ngeall ar fhiacha mé
Is go bhfáiscfí boltaí iarainn orm go barriallachaí mo bhróg.

Is a chomrádaí na dílse, táim cloíte go mór,
Is dá b’fhéadfainn is duitse a d’innseoinn dhá dtrian de mo bhrón;
Ach ós tusa is túisce a chífeas, a maireann do mo ghaolta
Ó tabhair mo bheannacht síos leat go Contae Mhaigh Eo.

Tá ba ‘gus caoirigh bána ag mo mhuintirsa i Maigh Eo
‘Gus mise anseo faraor faoi leatrom is faoi bhrón
Nach iomaí buachaill múinte ‘gus cailín socair stuama
Bheadh agam le mé a chaoineadh i gContae Mhaigh Eo.